Siglir tar il cuntegn

Header

audio
Scumond da far reclama per tubac – per tge vai?
Or da Actualitad dals 07.01.2022.
laschar ir. Durada: 5 minutas 8 Secundas.
cuntegn

Per tge vai? Iniziativa per scumandar reclama da tubac

L’iniziativa vul scumandar reclama per tubac dapertut nua ch’uffants e giuvenils vesan quella. Tenor il comité èsi mo uschia pussibel da proteger uffants e giuvenils. Per la Confederaziun va l’iniziativa memia lunsch. Ella ha elavurà ina cuntraproposta che scumonda intginas furmas da reclama.

Oz èsi lubì da far reclama per tubac en Svizra. I dat però restricziuns. Scumandà èsi da far reclama sche quella sa drizza explicitamain ad uffants u giuvenils, quai vala cunzunt tar occurrenzas u publicaziuns che sa drizzan a giuvenils. En blers chantuns datti ulteriuras restricziuns. En il radio u la televisiun èsi scumandà da far reclama per tubac. Per cumprar products da tubac na datti anc naginas reglas unifitgadas en Svizra: En 15 chantuns vala la limita da 18 onns, nov chantuns han ina limita da 16 onns (tranter quels er il Grischun) e dus chantuns n’han nagina regla. I dat però er fatschentas che vendan en l'entira Svizra products da tubac pir a partir da 18 onns.

Mess en pe l’iniziativa che vegn ils 13 da favrer a l'urna han diversas organisaziuns da sanadad. Uschia pretenda l’iniziativa er che Confederaziun e chantuns ston promover la sanadad d’uffants e giuvenils. Precis co è anc avert.

Er il Cussegl federal ed il parlament vulan restrenscher la reclama per tubac – l'iniziativa va per lur gust però memia lunsch. Perquai datti ina cuntraproposta che prevesa scumonds che valan en l’entira Svizra e che resguarda ils basegns da l’economia. Uschia fiss sponsoring d'occurrenzas naziunalas entras reclama da tubac vinavant lubì, sch'i sa tracta d'occurenzas per persunas creschidas. Er en la pressa, l'internet u tar kiosks vul la cuntraproposta lubir vinavant reclamas.

Tge capita tar in Gea u Na?

Avrir la box Serrar la box

Tar in Gea va l’iniziativa en vigur. Tar in Na va la cuntraproposta ch’il Cussegl federal ed il parlament han elavurà en vigur – sch’i na dat nagin referendum.

Las partidas sanestras proponan d'acceptar l'iniziativa – las dretgas refusan quella.

Ils 13 da favrer decida la Svizra en tut davart quatter fatschentas.

Dossier online

Avrir la box Serrar la box
Dossier online

Sin in clic tut quai ch'igl è da savair avant che votar: rtr.ch/votaziuns

RTR votaziuns 2022

Artitgels legids il pli savens

Scrollar a sanestra Scrollar a dretga