Siglir tar il cuntegn

Header

cuntegn

Per tge vai? La lètg per tuts

La populaziun decida ils 26 da settember davart la «lètg per tuts». La fatschenta è vegnida iniziada avant 7 onns entras ils verd-liberals. Pervia dad in referendum vegn quest project a l'urna.

Fin uss dastgan pèrs omosexuals sulettamain laschar registrar lur relaziun sco partenadi registrà, la maridaglia n'è pero betg pussibla. La «lètg per tuts» avra la lètg er per pèrs omosexuals. Sper la lètg duain pèrs omosexuals er survegnir ils medems dretgs tar la famiglia.

Il Cussegl federal ed il parlament èn gia s'exprimids per la lètg per tuts: Pèrs omosexuals na duain betg pli vegnir tractads auter che pèrs eterosexuals, è lur argumentaziun. Tut ils pèrs duain dastgar maridar ed uschia er survegnir ils medems dretgs e las medemas obligaziuns. Plinavant adempleschia la lètg per tuts in desideri da bleras persunas en Svizra.

Il comité da referendum vul proteger la lètg sco colliaziun tranter um e dunna. Be ord questa colliaziun possia dar vita. La nova lescha stgaffeschia famiglias senza babs ed il bainstar da l'uffant vegnia negligì, è lur argumentazun. Plinavant cuntrafetschia la lètg per tuts a la lescha.

Las posiziuns da las partidas èn gia sa mussadas durant las debattas e votaziuns en il parlament federal, cura che singuls represchentants da partida (p.ex. da l'Allianza dal Center) èn s'exprimids cunter. Ina parola uffiziala cunter la lètg per tuts han decis l'Uniun democratica federala (UDF) e la Partida populara Svizra (PPS). Las partidas grischunas suondan las posiziuns da lur partidas mamma, dentant cun in'excepziun: La PPS dal Grischun ha decis da dar liber la vusch.

Dossier online

Avrir la box Serrar la box
Dossier online

Sin in clic tut las fatschentas federalas, chantunalas e communalas: rtr.ch/votaziuns

RTR votaziuns 2021

Artitgels legids il pli savens

Scrollar a sanestra Scrollar a dretga