Emetturs da televisiun entaifer il pajais èn obligads d'investir 4% da lur svieuta en l'activitad creativa sin il sectur da film svizzer. Cun quai prestan ils emetturs ina contribuziun impurtanta per la producziun da films indigens. Adina pli gronda vegn dentant la purschida da films e serias online ch'ins po guardar via streaming. Per ils purschiders, per part globals, da tals servetschs da streaming, na datti dentant enfin uss nagina obligaziun d'investir.
Il Cussegl federal e la gronda part dal parlament sustegnan la midada da la lescha. Uschia vulan ins serrar ina largia cumparida tras la digitalisaziun e tractar ils servetschs da streaming tuttina sco ils emetturs da televisiun.
A las partidas giuvnas da la PPS, la PLD, ils giuvens verd-liberals sco er secziuns chantunalas da l'Allianza dal Center, èsi gartegià da rimnar avunda suttascripziuns, uschia ch'il referendum è gartegià.
Sin in clic tut davart las votaziuns dals 15 da matg.