L'hotellaria en il Grischun ha nudà il mars 685'290 pernottaziuns. Quai è in plus da 33,6% cumpareglià cun la medema perioda da l’onn avant. Quai scriva l’Uffizi per economia e turissem dal Grischun. Il dumber da giasts svizzers saja s’augmentà per 19,2% sin 459'707. In ferm plus da giasts ha tranter auter nudà la citad da Cuira e la Bregaglia.
En l'entira Svizra èn las pernottaziuns s’augmentadas il mars per 60,4% sin 3,01 milliuns. In fitg grond augment hai dà tar ils giasts da l'exteriur, cun in augment da 194,6%, cumpareglià cun il medem mais da l'onn passà.
Be la Val S. Pieder ha in pitschen minus
En il Grischun han prest tuttas regiuns fatg in plus. Be en la Val S. Pieder hai dà in lev minus da 3,1%. En la media da tschintg onns ha dentant er questa destinaziun fatg in bun resultat, cun 33,8% dapli giasts.
Guardà sur tschintg onns han tut las regiuns pudì augmentar las cifras da pernottaziuns. Ils megliers resultats han San Bernardino Mesolcina/Calanca (95,7%), Valposchiavo (52,1%) e Mustér Sedrun (51,7%). L'entir chantun Grischun ha, guardà sur tschintg onns, 27,6% dapli giasts.