L'hotellaria en il Grischun ha nudà il schaner 588'140 pernottaziuns. Quai è in plus da 58% cumpareglià cun la medema perioda da l’onn avant. Quai scriva l’Uffizi per economia e turissem dal Grischun. Il dumber da giasts svizzers saja s’augmentà per 37% sin 392'934. In ferm plus da giasts ha tranter auter nudà la citad da Cuira.
En l'entira Svizra èn las pernottaziuns s’augmentadas il schaner per 71% sin 2,18 milliuns. Cumpareglià cun la media dals ultims 5 onns, sa resulta dentant tuttina anc adina in minus da passa 14%.
In plus en tuttas regiuns
En il Grischun han quest onn tuttas regiuns fatg in plus. Cuira è ina che ha pudì profitar quest onn ferm, dentant ha la citad er patì fitg ferm pervi da la pandemia. Malgrà l'augment ferm da quest schaner, ha la citad dentant en la cumparegliaziun sur 5 onns anc adina radund 23,6% pli paucas pernottaziuns.
Guardà sur 5 onns han dentant er intginas regiuns pudì augmentar las cifras da pernottaziuns. Uschia per exempel la destinaziun da Mustér e Sedrun (17,9%), Flem Laax (27,1%) u er l'Engiadina San Murezzan (5%).