Siglir tar il cuntegn

Header

video
Plantahof: La construcziun dal nov center da dietas ha cumenzà
Or da Telesguard dals 23.02.2022.
laschar ir. Durada: 2 minutas 18 Secundas.
cuntegn

Plantahof Construcziun per center da dietas ha cumenzà

Suenter avair planisà intensivamain il project, duain ils bajetgs per il center da dietas dal Plantahof vegnir renovads pass per pass enfin l'onn 2025. L'infrastructura dal center haja gronda muntada per il Plantahof sco er per l'agricultura en Grischun.

Suenter passa 40 onns han ils bajetgs intginas maclas ed il center da dietas, sco er la sala, la cuschina ed ils alloschis han basegn da vegnir renovads.

Infrastructura moderna e flexibla

La renovaziun dal center da dietas pussibilitescha da separar ils bajetgs e da pussibilitar in'infrastructura orientada al futur e flexibla. Cun il model da minergia tenor il standard da P-Eco datti ina construcziun effizienta per l'energia e che dat quità da las resursas. Il medem mument vegnan resguardadas cun quest project er las perscripziuns da la lescha pertutgant energia, ambient, segirezza sco er la lescha da persunas cun impediments. Cun ils bajetgs planisads vegn er il purtret dal Plantahof meglierà ed i vegn structurà las parts dadora e dadens a moda precisa e qualitativa.

Il center da quest project è la sala da mangiar, sco punct d'inscunter social e sco colliaziun tranter il bajetg principal, la scola, l'auditori ed il nov bajetg cun la cuschina. Grazia a la cumbinaziun da la sala e la cafetaria, po l'infrastructura vegnir duvrada a moda flexibla. Il bajetg da la cuschina pussibilitescha dad elavurar e magasinar ils products da l'atgna puraria. Er las chombras èn lura construidas tenor il standard actual e pon vegnir duvradas sco chombras singulas u dublas.

La nova infrastructura avria novas perspectivas per il Plantahof, en vista a scolaziun e furmaziun da la generaziun giuvna da puras e purs sco er per cussegliar da famiglias.

Fasa da planisaziun

Avrir la box Serrar la box

Ils 9 da favrer 2020 ha la populaziun grischuna approvà il credit da 24,5 milliuns francs per renovar il center da dietas dal Plantahof a Landquart.

Planisà e realisà il project ha la cuminanza da lavur Nickisch Walder Architekten (Flem) e Planalytik (Flums) ensemen cun il team da la planisaziun dal fatg.

Il mars 2021 ha la vischnanca da Landquart dà la lubientscha da construcziun per il project.

Project en etappas

Ils novs bajetgs vegnan bajegiads uschia ch'i po vegnir lavurà vinavant durant la fasa da bajegiar. Plinavant n'èsi betg necessari da construir provisoris pli gronds. Cun bajegiar en etappas po er vegnir construì cun quità envers las resursas. Sco emprim vegn bajegià l'alloschi, suandà da la cuschina cun la sala. L'alloschi duai esser accessibel a partir da la primavaira 2023. La fin dal 2024 èsi planisà da pudair duvrar la cuschina e la sala. La primavaira dal 2025 duai lura il project esser a fin.

audio
Per tadlar curt e cumpact
ord RTR Audio dals 23.02.2022.
laschar ir. Durada: 52 Secundas.

RTR novitads 10:00

Artitgels legids il pli savens