Siglir tar il cuntegn

Header

audio
Lentiglias enstagl chicras
Or da Actualitad dals 31.05.2022.
laschar ir. Durada: 2 minutas 34 Secundas.
cuntegn

Plantahof experimentescha Enstagl da chicras duai dar lentiglias e favatschas indigenas

Sco humus, falafel u en la salata u suppa – chicras, per tudestg «Kichererbsen», èn ils davos onns vegnidas pli e pli popularas. Damai che quellas fan dentant in lung viadi enfin tar nus en las stizuns ha il Plantahof gì l’idea da cultivar chicras indigenas enstagl da laschar importar ellas per exempel da l’India u l’Australia.

Betg in clima ideal

Quatter onns ha il Plantahof empruvà da cultivar il legum ch’è ritg da proteins. Be ina giada han els dentant pudì racoltar chicras. A Landquart èsi memia bletsch e fraid per las chicras.

Malgrà ch’igl è tar nus pli sitg ch’en la Svizra Bassa, avain nus memia pauc ditg sitg durant la stad.
Autur: Andreas Vetsch Spezialist per la cultivaziun dad ers tar il Plantahof

Uschia han Andreas Vetsch e ses team tschertgà in’alternativa e chattà ina: Favatschas e lentiglias. Favatschas èn dal reminent enfin en ils onns 1990 vegnidas cultivadas en la Svizra, dentant sco pavel d'animals, raquinta Vetsch.

Cultivar sez enstagl d'importar

Uss saja la dumonda suenter quels legums, ch’èn ritgs da protein, puspè turnada – questa giada dentant sco mangiativa per ils carstgauns e betg per ils animals. Saja quai sco latg alternativ, burgers vegetarians u auters products.

Quai èn tut products che vegnan importà enfin uss. Quai pudessan nus er cultivar sin ers svizzers.
Autur: Andreas Vetsch Spezialist per la cultivaziun dad ers tar il Plantahof

L’emprim facit sappia Andreas Vetsch e ses team lura far entschatta atun. Tut tenor l’aura vegnan lura las emprimas favatschas e lentiglias racoltadas.

RTR acutalitad 17:00

Artitgels legids il pli savens