+3° T'imagina: Tuttenina èsi 3° pli chaud …

Tge capita, sche la temperatura media è en Svizra trais grads pli auta? Tge consequenzas ha quai per natira, per economia e noss stil da viver? Guardai l'emprima saira tematica naziunala da la SRG SSR cun Andri Franziscus ed Annina Campell, ils 29 da november 2017, a las 20.05 sin SRFinfo.

glatscher che lieua Bild in Lightbox öffnen.

Legenda da maletgs: Il glatscher da l'Aletsch da 23 kilometers lieua – El è sa reducì per radund 3 kilometers dapi il 1870. Reuters

Tge capita, sche la temperatura media è en Svizra trais grads pli auta? Tge consequenzas ha quai per la natira, per l'economia e per noss stil da viver? A questas dumondas sa deditgescha l'emprima saira tematica naziunala da la SRG SSR. Radiotelevisiun Svizra Rumantscha (RTR) preschenta ensemen cun ils moderaturs Andri Franziscus ed Annina Campell ils 29 da november 2017 a las 20.05 sin SRFinfo la saira tematica rumantscha «+3°».

Ficziun documentara «Ina stà cun chaliras»

En il center da l'emissiun stat ina ficziun documentara cun il titel «Ina stà cun chaliras» (tudestg «Gefährlicher Sommer»). Ina famiglia en il chantun Vallais passenta ina stad da chaliras cun bleras fassettas. La mamma è dumandada sco commembra dal cussegl communal, il bab lavura sut cundiziuns diffizilas en l'ospital ed ils uffants sentan ils privels da la natira durant in champ da vacanzas.

Ina stad da chaliras e sias consequenzas

Questa ficziun documentara, realisada dal reschissur da Cuira Daniel von Aarburg, vegn emessa en trais parts e porscha uschia la basa per ulteriuras contribuziuns e discussiuns. En il studio a Cuira èn tranter auter envidads sco giasts il climatolog Jan Sedlacek, il glaziolog Felix Keller e la gestiunaria dal WWF Grischun Anita Mazzetta.

Damain enviern, dapli stad

Las consequenzas dal stgaudament dal clima per il turissem èn centralas per la versiun rumantscha da la saira tematica. Annina Campell s'annunzia dal post extern sin il Crap Sogn Gion, ses giast è il visiunari da turissem Reto Gurtner. En il studio sa confrunta il schef da Grischun Vacanzas, Martin Vincenz, cun las dumondas davart il futur dal turissem grischun.

Sursiglir cuntegn supplementar

L'emissiun «Plus3°»

L'emissiun «Plus3°»

L'emissiun «Plus3°» da Radiotelevisiun Svizra Rumantscha pon ins guardar

  • ils 29-11-2017
    a las 20.05 uras
    en directa sin SRFinfo.
  • Sin ils chanals da social media pon ins prender part a la discussiun cun il hashtag #RTRclima.

En tut las quatter linguas naziunalas – per rumantsch sin SRFinfo

La saira tematica naziunala vegn emessa en tut las quatter linguas naziunalas. La ficziun documentara e las contribuziuns èn las medemas sin tut ils chanals. Differents èn ils accents, la tscherna dals giasts e la lingua. Planisadas èn era colliaziuns tranter las regiuns linguisticas. La versiun rumantscha pon aspectaturas ed aspectaturs guardar sin SRFinfo.

Andri Franziscus preschenta l'emissiun da premiera che dura trais uras or dal studio a Cuira. Annina Campell s'annunzia dal post extern a Laax. La presidenta da la regenza Barbara Janom Steiner e la scriptura Romana Ganzoni han quella saira ina carte blanche per critica e dumondas sin las medias socialas. La versiun rumantscha da la saira tematica vegn emessa sin SRFinfo e sin rtr.ch. Online chatt'ins plinavant blers artitgels e numerusas contribuziuns en connex cun il tema.