Ils Rumantschs èn tendenzialmain pli fitg da l'opiniun che la midada vegni pli sperta. Els numnan er pli savens la reducziun da la schelira permanenta e bovas sco consequenzas da la midada dal clima.
En l'entira Svizra vegn numnà il pli savens il luar dals glatschers sco consequenza la pli ferma, avant l'augment da la temperatura e dapli catastrofas natiralas.
La scienza suppona che la temperatura media s'augmentia sin la fin dal 21avel tschientaner per 3°. Ina da las dumondas è stada en quest connex: Co taxais Vus questa supposiziun? Ina gronda maioritad taxescha quai sco inquietant. (mira diagram)
73% èn da l'avis che la midada dal clima portia dapli disavantatgs che avantatgs. En la Svizra tudestga giuditgeschan pli paucs la midada sco negativa ch'en la Svizra latina.
Effects positivs da la midada
Radund in tschintgavel da las persunas dumandadas vesan las temperaturas pli miaivlas ed envierns betg uschè fraids sco effect positiv. Tranter ils Rumantschs vesan quai gnanca 10% uschia. Il pli fitg mancan al pievel rumantsch envierns fraids cun blera naiv. Sco effect il pli positiv vesan las Rumantschas ed ils Rumantschs l'aria schubra, perquai ch'i vegn renunzià sin combustibels fossils e perquai che la purschida dal traffic public vegn schlargiada.
Propostas per soluziuns
Basegn d'agir vesan Svizras e Svizzers en emprima lingia sin nivel internaziunal, lura tar il cumportament da mintga singul e pir sin posiziun trais sin nivel naziunal. Subvenziunar energias regenerablas chatta dapli sustegn che suttametter ils combustibels fossils a la taglia. Tar omaduas mesiras è dentant decisiva l'orientaziun politica da las persunas dumandadas.
Mesiras persunalas
Sco mesira la pli effectiva vesan ils blers da charrar damain cun auto, da nizzegiar pli savens il traffic public u da charrar cun il velo. Ils Rumantschs han numnà il pli savens da duvrar ils meds dal traffic public avant che charrar damain cun l'agen auto. Ulteriuras mesiras ch'èn numnadas en l'enquista èn da reducir il consum d'electricitad e da nizzegiar energias regenerablas.
RR actualitad 06:00