Siglir tar il cuntegn

Header

cuntegn

Pornografia d'uffants Dapli pedofilia en il Grischun

En il Grischun è ils ultims onns s'augmentada marcantamain la pedofilia en l'internet. L'onn passà ha il post responsabel dal chantun elavurà 56 cas da suspect da pornografia scumandada. L'onn avant eran quai anc 36. Quai resulta da las cifras che la regenza grischuna ha publitgà sin ina dumonda or dal parlament.

Contact online tranter uffants e creschì

Tenor la plattafurma naziunala «Giuventetgna e medias» da l'Uffizi federal d'assicuranzas socialas han ina gronda part dals uffants e giuvenils almain ina giada gì contact cun persunas cun intenziuns sexualas en l'internet:

  • 13% dals uffants da 12 fin 13 onns
  • 23% dals uffants da 14 fin 15 onns
  • 33% dals uffants da 16 fin 17 onns

La responsabladad dals chantuns

Responsabels per la persecuziun penala da pedofils èn ils chantuns. Bleras annunzias da suspect vegnan da l'exteriur. L'Uffizi federal da polizia (fedpol) dat lura vinavant quellas als chantuns. Fedpol agescha sco post central, coordinescha e garantescha il barat d'infurmaziuns tranter ils chantuns e tranter partenaris da l'exteriur sco er tranter organisaziuns spezialisadas. Quai succeda entaifer la Rait da las autoritads da polizia per cumbatter la criminalitad digitala (NEDIK). La rait exista dapi il 1 da schaner 2021.

RTR novitads 12:00

Artitgels legids il pli savens