Sin la via da colliaziun tranter la Forcola di Livigno e La Motta èn collidads la sonda in velo ed in auto. Il manischunz dal velo da cursa è vegnì blessà mezgrev e sgulà cun la Rega en l'ospital a Sondalo en l'Italia, ha communitgà la Polizia chantunala dal Grischun.
In manischunz d'auto ha stuì franar andetg pervi dad in auter auto, che vegniva encunter. Quel era, sco i para, per part sin ses vial. Per betg collidar cun l'auto davant el è il ciclist da 48 onns guntgì a sanester e perquai collidà cun in auter auto che vegniva encunter. Il manischunz da l'auto che charrava per part sin il vial oppost cun numer d'auta da l'Italia è charrà senza tegnair airi fin a Livigno. La polizia sclerescha l’exact andament da l’accident.