Las dumondas che vegnan tar TECUM derivan da persunas privatas, chasas da tgira, ospitals e da la Spitex. Esser ina notg tar insatgi che passenta ses davos dis da la vita, quai è il pensum da TECUM. Edi Bonorand da Trin è in dals voluntaris ch'èn en servetsch per l'organisaziun. Dapi sia pensiun avant set onns accumpogna el adina puspè persunas muribundas.
Dumondas
«Co vai vinavant suenter la mort?», quai saja la dumonda che fatschentia bleras e blers da ses clients. Tema n'hajan els per pli betg, i dettia plitost muments da malsegirtad, perquai ch'ins na sappia betg sco ch'i giaja enavant. Quels che restian enavos hajan autras dumondas che quels che giajan.
Hai jau fatg tut il pussaivel en favur da la persuna che va?
Bleras giadas vulessan ils parents ed amis era savair sche la persuna muribunda haja forsa anc vulì dir insatge. Per part sustegnia Edi Bonorand era la famiglia da quels che van. I dependia fitg dal conturn co il fatg che la vita giaja a fin vegnia tractà. En ina chasa da pliras generaziuns saja la mort ina chaussa fitg natirala che tutgia tar la vita. Là nua ch'ils muribunds sajan sulets ed ils proxims vegnian tiers, possia quai esser tut in autra chaussa.
Tscherts n'èn anc mai sa fatschentads cun la mort. Alura èn els cun ina giada pertutgads persunalmain cun il fatg che la vita va a fin.
Prender cumià
Pudair prender cumià saja fitg impurtant. Surtut la cuminanza saja durant il temp da pandemia vegnida in pau a la curta cun prender cumià. Sco atgnamain usità n'era quai per part betg pussaivel che tuts pudevan ir al funeral. Sch'ins n'haja betg gì la pussaivladad da prender cumià persunalmain, alura possia gidar dad ir en la ruassaivladad, meditaziun u en l'oraziun. Era da star da cumpagnia e pledar da las regurdientschas da la persuna che saja ida, possia esser ina furma da prender cumià.
Dapi sia pensiun avant set onns fa Edi Bonorand lavur voluntaria per TECUM. Avant ha el lavurà sco cussegliader da clamada ed aveva accumpagnà tetra- e paraplegichers enavos en la vita professiunala. Duas fin trais notg il mais accumpogna el persunas muribundas.
Per pudair far quella lavur ha el fatg in curs per sa preparar sin quest pensum.
Per el è la mort insatge fitg natiral che tutga tar la vita. El è persvas che l'oraziun po dar blera forza. Er mintga singul cas ch'el accumpognia dettia enavos insatge ad el. El sentia ina confidenza enorma dals proxims e dals clients.
Per prender distanza ed elavurar sias experientschas gidia el da scriver il rapport obligatoric per TECUM, pia metter sin palpiri quai che fatschentia.