Gisula Tscharner è spirituala libra pensiunada e stat a Veulden. Ella giaja sez gugent sin viadi e sa numna in pau «nomada». Sch'ella partia da chasa saja quai adina in pau trist per ses um che restia enavos a chasa. Per ella che giaja, na saja quai insumma betg trist, uschia descriva ella quest process.
Limitar il temp
Sch'insatgi mora saja impurtant da laschar tiers ils sentiments, dad esser conscient ch'ins perdia ina part. Quai laschia enavos ina plaja. Quella saja da tgirar e da dar in pau temp. Dentant saja er impurtant da limitar il temp dad esser trist. L'usit vegl, da sa vestgir in onn en nair suenter ch'insatgi saja mort, chatta ella fitg bun, passentar in tschertgel da tuttas stagiuns senza quella persuna. Er il past da bara saja in ritual fitg impurtant. Quai prolungheschia la ceremonia da prender cumià. Star da cumpagnia e sa regurdar vid la persuna, ed er rir, quai dettia era puspè nutriment a l'olma.
Pli tragic ch'il funeral è stà, pli legher ch'il past da bara era.
En sia vita professiunala haja ella adia guardà exactamain che la mesadad dal predi saja per prender cumià, per esser trist e per laschar liber la persuna morta. Tschella mesadad saja per quels che restian enavos en la vita, per ir vinavant ina nova via senza quel che saja ì.
Viver cun cancer da pel
Maura Cajacob ha survegnì avant dus onns la diagnosa da cancer da pel nair cun metastasas. Quai è stà a l'entschatta in schoc, dentant vaira svelt ha ella acceptà ses destin. Uschia è ella sa decisa da giudair anc mintga di ch'ella ha e da restar positiva.
La dunna da 47 onns ha quatter uffants en la vegliadetgna tranter 9 – 22 onns. Cun els discurra ella avertamain da sia diagnosa. Ella na vul betg far tema ad els, dentant san els cleramain che lur mamma savess murir. Perquai che ella va però entur aschi luc cun sia situaziun fa quai era pli simpel per ils uffants.
Prendì cumià n'ha ella anc betg explizitamain da sia famiglia, e quai na vul ella era anc betg. Ella guarda però ch'ella è adina en pasch cun tuts.
Per mai è prender cumià dad avair pasch cun tuts e da savair ir en pasch cur ch'igl è uschè lunsch.
Quant ditg ch'ella vegn anc a viver na vul la dunna da Cuira betg savair uschè exact, quai saja irrelevant per ella. Bler pli gugent viva ella da di a di e giauda ils muments ch'ella po passentar cun sia famiglia, ma er ils muments suletta.