Sur Pasca è la situaziun da privel da fieu vegnida in zic pli precara er en il nord dal Grischun. Pervi da la sitgira che cuzza gia dapi emnas ed il vent ferm nà dal nord, valan per il Mesauc, la Calanca, il Puschlav e la Bregaglia sco er per il chantun Tessin in scumond absolut da far fieu en il liber.
Il privel d'incendis da guaud è actualmain grond, stgalim 4, en la Val dal Rain da Cuira, il Partenz, il Scanvetg, la Tumleastga e Mantogna sco er per Schons ed Alvra. En las ulteriuras valladas dal nord da las alps ed en Engiadina e Val Müstair, vala in privel considerabel.
Per pudair calmar la situaziun, na tanschi betg sch'i plova be pauc. La vegetaziun ha il mument retard, cunquai ch'igl è memia sitg. La feglia setg, il pastg sitg e las chaglias da l'onn passà, pon pigliar fieu fitg svelt. Perquai ch'i n'è betg vegnì fatg attenziun, hai gia dà plirs incendis da guaud en Grischun. Ils pumpiers han gia stuì vegnir en acziun pliras giadas pervi da cigarettas bittadas davent senza quità, e pervi da fuainas che n'eran betg stizzadas bain avunda.