La radunanza communala ha approvà il preventiv 2022 che prevesa in lev surpli d'entradas da 20'400 francs – tar entradas ed expensas da stgars 11 milliuns francs. Il pe da taglia ha il suveran decidì da laschar tar 75% da la taglia chantunala simpla. Era previs per l'onn che vegn èn investiziuns nettas da 6,6 milliuns francs.
Sutpassadi dals binairs dat da discutar
Refusà cun 37:20 vuschs ha la radunanza communala suenter discussiun intensiva in credit da 63'000 francs per meglierar la vista en il sutpassadi. La suprastanza vuleva dar colur clera a las paraids e midar l'illuminaziun. Approvà ha il suveran però il credit da 70'000 francs per remplazzar la marcaziun cotschna sin la via cun catram cotschen. Questa signalisaziun cotschna serva sco agid d'orientaziun per peduns e velocipedistas che vulan traversar la via.
Era cun chaschun da la radunanza communala ha la vischnanca da Malans puspè survegnì il label «citad d'energia» – quai che munta la prolungaziun dal label per Malans per ulteriurs 4 onns.