Il chantun Grischun vul far pli visibel las dunnas en la publicitad. Savens hai num ch'ins na chattia naginas spezialistas. En differentas branschas datti dentant senza auter in grond dumber d'expertas per preschentaziuns publicas e sco persunas che dattan infurmaziuns.
Chattar expertas tras ina banca da datas
Per pudair chattar quellas expertas ha il Post da stab per l'egualitad da las schanzas per dunnas ed umens stgafì ina collecziun da bancas da datas. Cun agid da la pagina d'internet «stagl.gr.ch» pon ins chattar expertas naziunalas ed internaziunalas; saja quai per gremis, per occurenzas u er per intervistas.
Da l'autra vart pon expertas duvrar la banca da datas per publitgar lur profil e per sa metter a disposiziun per preschentaziuns publicas ubain sco persuna che dat infurmaziuns.
Ils protagonists èn ils umens
En ina gronda part dals rapports da medias sajan ils protagonists umens. Sumegliant saja tar discussiuns al podium u a la televisiun. Tenor il Post da stab per l'egualitad saja ina rapportaziun gista ed eguala tranter las dunnas ed ils umens però centrala per las stentas d'egualitad. Las medias influenzeschian ferm il pensar da la populaziun.
