La recepziun dals hotels po persequitar direct, tge giasts che nizzegian cura tge purschidas. Quai grazia a la carta da giasts. Vul dir: Sch'ina persuna va cun pedalo u nizzegia las pendicularas. Quai ha confermà in’emploiada d’hotel anonimisada ad Arosa envers la gasetta Blick. Arosa Turissem relativescha la rinfatscha.
Access gea – però limità
Tenor il directur da turissem d’Arosa Roland Schuler na constettia quai betg ch’ils hotels vesian mintga attracziun ch’il turist visita. Perencunter constettia quai ch’ils hotels hajan in tschert access limità – che valia dentant be per ils giasts da l'agen hotel. Uschia pon hotels vesair l’emprima e davosa attracziun visitada da l’entira dimora. Era Claustra-Tavau conferma envers RTR ch’els hajan in sumegliant sistem. Tar els vesan ils hotels la davosa attracziun da mintga di. Il proxim di vegn quella puspè stizzada.
Roland Schuler declera ch’ils hotels possian tar ils agens giasts numnadamain vesair be, en tge indriz che la carta è vegnida utilisada, dentant betg per tge purschida u product. Mo tuttina giaschia la protecziun da datas a cor ad els. Quai per exempel cun far attent la glieud sin la decleraziun da protecziun da datas.
N'ha betg d'interessar ils hotels
Auter vesan quai ils experts da protecziun da datas. Era sch’il hotels hajan access limità saja quai memia bler, di Thomas Casanova protectur da datas dal chantun Grischun. Il hotel astgass be avair access a datas persunalas ch’els dovran per la lavur. Vul dir: per exempel num ni email per pudair cudeschar il letg. Nua ch’il giast è da via durant sia dimora, n'haja betg d'interessar ils hotels.