I saja bain ina sfida da cuvrir il basegn d'electricitad che creschia adina pli fitg en Svizra. Cunzunt er perquai che las ovras atomaras duain vegnir tschentadas giu, uschia la regenza en sia resposta sin ina dumonda dal deputà dal Cussegl grond Diego Deplazes. I saja in'incumbensa pretensiusa per tut ils pertutgads da far la midada tar las energias regenerablas.
En il Grischun vegnia dentant gia uss producì fitg blera forza electrica, numnadamain quatter giadas uschè bler sco quai ch'i vegn duvrà. Per gronda part vegn questa energia producida cun forza d'aua. Perquai saja il Grischun er en ina situaziun excellenta puncto segirtad dal provediment sco er puncto capacitads da la rait, uschia la regenza vinavant. Perquai haja il mantegniment sco er l'optimaziun da las ovras d'aua prioritad.
Las dumondas vegnan tractadas e tut tenor er discutadas en ina da las proximas sessiuns dal Cussegl grond.
