Siglir tar il cuntegn

Header

video
«un solo arco» sa numna il project per la punt a Lai ed Arosa
Or da Telesguard dals 10.09.2021.
laschar ir. Durada: 2 minutas 50 Secundas.
cuntegn

Punt Son Gliezi a Cuira «Un solo arco» sa numna il project tschernì

Uss èsi cler co che la nova punt da Son Gliezi a Cuira duai vesair ora. La regenza grischuna ha acceptà la proposta da la giuria ch'ha tschernì il victur tranter ils 41 projects inoltrads. Il project «un solo arco» sut il biro d'inschignieria Conzett Bronzini partenaris da Cuira.

purtret da la punt planisada.
Legenda: La punt da Son Gliezi duai colliar la via dal Güglia, direcziun Lai, cun quella dal Scanvetg, direcziun Arosa. MAD, Conzett Bronzini partenaris SA
audio
Punt Son Gliezi: Direct ad Arosa – senza manischar tras Cuira
ord Actualitad dals 10.09.2021.
laschar ir. Durada: 2 minutas 48 Secundas.

Il project da Conzett Bronzini partenaris prevesa ina punt ad artg d'atschal da 420 meters. La punt duai colliar directamain la via dal Güglia cun la via dal Scanvetg, sco er distgargiar il traffic dal quartier «Sand» a Cuira. Il project da Conzett Bronzini adempleschia il meglier ils criteris concepziunals. Il project correspundia sin plirs plauns a l'idea da persistenza. Plinavant saja la punt tranter tut quellas inoltradas, la pli curta ed il purtret giaja a prà a moda armonica cun il maletg dal lieu e la cuntrada.

Cura che la punt po dentant propi vegnir construida stat anc en las stailas. Sche tut giaja bain, saja quai en 5-7 onns ha il cusseglier guvernativ Mario Cavigelli ditg envers RTR. Ina gronda dumonda è quantas protestas ch'i vegnia a dar encunter quest project. Plinavant n'è er la finanziaziun anc betg clera. Per exempel quant bler dals custs che la Confederaziun surpigliass. Mario Cavigelli stima custs da 50 fin 100 milliuns francs per la punt.

Project cun lunga isorgia

Gia l'entschatta dals onn 1970 han ins elavurà in project «Hochbrücke Plessur» per colliar la via dal Güglia cun la via d'Arosa. Quest project n'è però mai propi vegnì enconuschent. L'ultim project per la punt era vegnì annullà il 2008 sin basa d'ina sentenzia dal Tribunal federal.

RTR novitads 12:00

Artitgels legids il pli savens