La regenza grischuna vul esser toleranta durant l’emprim onn ch’i daventa obligatoric da metter puschina cun uders. Il 2022 valia anc sco onn transitoric. Quai ha il cusseglier guvernativ responsabel Marcus Caduff respundì sin la dumonda correspundenta da Walter Grass (PPS) en l'ura da dumondas dal Cussegl grond.
Sch’i na vegnia durant l’onn 2022 betg lavurà cun il sistem d’uders per metter puschina vegnia quai nudà sco manco. Sin ils pajaments directs n’haja quai però nagin effect negativ. L’Uffizi chantunal per natira ed ambient vegnia a decider cun mesira. Denunzias penalas sajan dentant tuttina pussaivlas sch’il manco sa repetia u sch’ils surpassaments èn pli gronds.
La regenza saja pertscherta ch’il sistem cun uders saja ina gronda sfida per las purarias grischunas, pervi da las bleras spundas taissas. Ella possia dentant sin il pli dumandar per ina fasa transitorica pli lunga tar la Confederaziun, cunquai che lezza haja decis l’obligatori.
