In medi, in reverenda ed in affarist da San Murezzan han gì l’idea d’elavurar safran en il Puschlav. Sin il mises da Cristiano Luminati, si sur Cologna s’inscuntran ils trais umens savens. Dapi in onn pia betg be per star en cumpagnia, mabain er per lavurar. L’idea ed il terrain è da l’affarist Cristiano Luminati. Sin in champ da var 10 sin 10 meters han ils trais amis semna las tschagulas da safran e la racoltà è entant gia sin maisa. Fin var 500 plantinas per di han ils trais umens racoltà quest atun ed elavurà il safran.
Té e risot
Ord l’emprim safran dal Puschlav hai dà té, di Cristiano Luminati, ed el saja grategià. Uss sa legran ils trais umens sin in risot cun il safran indigen. Quest risot giaudian els lura en cumpagnia sin il mises.
Main lavur – proxima sfida
La plantina dal safran è ina planta da quatter fin tschintg onns e sch’ins lavura precaut datti mintg’onn dapli. Uschia duai dar ils proxims onns damain lavur per ils trais amis. Tuttina spetgan gia la proxima sfida. Els han numnadamain da far ponderaziuns sur tge chanals che la spezia duai vegnir vendida.
