L'investur da Val Sogn Pieder Remo Stoffel ha pajà tut ses daivets da taglia tar il chantun Grischun. Quai ha il cusseglier guvernativ responsabel Peter Peyer respundì sin ina dumonda ord il Cussegl grond.
Quant auts ch'ils daivets èn stads n'ha el dentant betg pudì tradir pervia dal secret da taglia, be ch'i sa tractia da daivets dal 2003 enfin l'onn 2019. Lukas Horrer da la partida socialdemcratica che aveva fatg la dumonda a la regenza avess gugent savì gliez. La regenza ha manegià ch'i saja stà ina lunga istorgia cun sentenzias da diversas instanzas – ed i haja duvrà gronds cumbats enfin avant la dretgira federala per cuntanscher che Remo Stoffel paja ses daivets da taglia. El haja la finala pajà tut ils daivets avant ch'els scadan – quai schabegia suenter 15 onns. Dapi radund dus onns viva l'investur da Val a Dubai.
