Construida avant 93 onns da la secziun Son Gagl, surdada avant 3 onns a la secziun Tavau: La chamona Grialetsch n’era gia ditg betg pli en in stadi che correspundeva als standards d’ozendi. Chombras stretgas, nagin plaz per ils guardiachamona per cuschinar u sa retrair, e la tecnica ed ils indrizs igienics èn vegls, sche betg antics.
Investiziun da 3,2 milliuns francs
Per 3,2 milliuns francs ha la secziun Tavau renovà la chamona questa stagiun. Ina renovaziun cumpletta ed ina construcziun annexa anc ina giada uschè gronda sco la part existenta. Tut quai senza vias d’access. Per realisar quai en uschè pauc temp han ins installà in vitg da containers, nua che lavureras e voluntaris han durmì durant l’emna. Med da transport principal era il helicopter. Passa 1'100 rotaziuns cun persunas, maschinas e material ha el fatg davent dal pass dal Flüela.
Emprims giasts pon vegnir la fin da december
La chamona era bain serrada per giasts; Ils novs guardiachamona han però tuttina passentà l'entira stad sin chamona. Els han procurà per il bainstar da lavureras e lavurers, ed era gidà a renovar e fabritgar, nua che quai era pussibel. Las lavurs da construcziun èn ussa finidas. Las proximas emnas vegn testà l’entira tecnica. Ils emprims giasts dastgan lura visitar la chamona a partir dals 27 da december.