Dapi l'entschatta da l'onn hai dà 154 dumondas d'asil en il Grischun. Quai èn 7 dapli che l'entir onn passà.lls requirents vegnan cunzunt da l'Afghanistan, da la Siria e da la Tirchia.
Quai ha in tant da far cun quai ch'igl è puspè pli simpel da viagiar – era sur plirs continents.
Anc adina saja quai per gronda part umens persuls, mo era famiglias cun uffants e minorens senza accumpagnament, di Georg Carl da l'Uffizi chantunal per migraziun e dretg civil. Tenor el è quai tantas dumondas sco avant corona.
65% dals requitents d'asil lavuran
Ils process d'integraziun, ils programs da lavur e scolaziun, han pudì vegnir manads vinavant cun agid da concepts da protecziun. Sco la statistica dal Secretariat da stadi per la migraziun mussa, lavuran en il Grischun 65% dals requirents acceptads provisoricamain. Auter che quai ch'il num lascha sminar, restan dus terzs dals requirents cun quest status a lunga vista en Svizra.
Pliras persunas ch'avessan stuì u vulì bandunar la Svizra sajan anc adina qua, di Georg Carl. Quai perquai che tut ils pajais n'èn betg anc cuntanschibels pervia da restricziun d'entrada; per exempel l'Algeria, l'Irac e la Sri Lanka. Per l'auter onn spetga Georg Carl sulettamain cun in lev augment da las dumondas d'asil. Quella prognosa possia però gia en in mais betg pli esser actuala.