Gia ils ultims dus mais saja la frequenza da la glieud che va en sortida a Cuira uschè auta sco avant la pandemia, quai tenor la Polizia da la citad da Cuira. Questa fin d'emna, l'emprima senza restricziuns da corona, n'eran las vias dal «Welschdörfli» betg fullanà plainas.
Fatschas rientas
En las vias da Cuira han ins vesì questa fin d'emna fatschas rientas. La gronda part da quels ch'èn en sortida para d'esser cuntenta ch'ins po finalmain metter d'ina vart las mascrinas, e che la normalitad turna en il mintgadi.
Finalman libertad e normalitad. Ussa pon ins puspè sa muventar libramain, e po entrar dapertut.
Tar inqualin restan dentant era anc in pau dubis e malsegirezza, perquai che quasi tut las restricziuns èn crudadas dad oz sin damaun.
Fin d'emna ruassaivla
La Polizia da la citad da Cuira concluda la dumengia, ch'i saja stà ina fin d'emna plitost ruassaivla cun in dumber normal da glieud per las vias da Cuira. I n'haja dà nagins eveniments extraordinaris.