L'economia fetschia memia pauc per rinforzar il sistem da milissa. Quai resulta da las retschertgas dal project «PoliWork» da la Scol'auta spezialisada dal Grischun (FHGR). Per che uffizis da milissa duessen vinavant esser pussaivels en la politica regiunala sper la professiun, dovria quai meglras cundiziuns da basa, concluda la FHGR.
Sistem da milissa gea, però betg sin cust da la firma
Onn per onn hajan vischnancas adina dapli fadia d'occupar lur uffizis da milissa. E quai malgrà che l'interess da persunas saja atgnamain grond avunda. In problem è tranter auter la flexibilitad. Ozendi ston politichers e politcras da milissa esser disponibels durant l'entir di. In'auter punct saja che l'appreziaziun e stima manchia savens. Ed era la cumpensaziun ch'ins survegnia na saja savens betg in remplazzament adequat per l'entrada da professiun che giaja a perder.
Suletta proposta acceptada da firmas: Cumpensaziun tenor EO
Uschia na saja quai nagina surpraisa che persunas che lavuran en il sistem da milissa giavischan dapli sustegn da l'economia. 70% da la fatschentas na vulian tenor la rertscherca da la FHGR però betg s'engaschar. In'alternativa che vegniss però era sustegnida da fatschentas, fissia ina cumpensaziun tenor l'urden da cumpensaziun dal gudogn EO per persunas ch'occupan uffizis da milissa – sco quai ch'ins enconuscha per exempel gia tar il servetsch militar.