Siglir tar il cuntegn

Header

Rangaziun da las candidatas ed ils candidats per la regenza.
Legenda: RTR
cuntegn

Retschertga regenza Parolini sto tremblar

Ils dus cussegliers guvernativs en uffizi Marcus Caduff e Peter Peyer vegnissan reelegids – per Jon Domenic Parolini vegni stretg. Quai mussa ina retschertga che l'institut Sotomo ha fatg per incumbensa da RTR e la Somedia sis emnas avant las elecziuns. Ils resultats èn dentant stretgs.

A la testa datti nagina surpraisa: Marcus Caduff da l'Allianza dal Center sco er Peter Peyer da la Partida socialdemocratica han bunas cartas per defender lur sezs. Suenter vegni dentant stretg – tenor la retschertga fissan er ils candidats novs Martin Bühler da la PLD, Carmelia Maissen da l'Allianza dal Center e Roman Hug da la PPS elegids. Stgars suenter quest trio - e betg elegì - è il cusseglier guvernativ en uffizi Jon Domenic Parolini da l'AdC.

audio
Cursa stretga per ils sezs en regenza – Michael Hermann analisescha
aus Actualitad vom 13.04.2022.
abspielen. Laufzeit 3 minutas 2 Sekunden.
Ins po dir cun segirtad che dus da trais en uffizi vegnan reelegids. Segir è er che Jon Domenic Parolini sto tremblar – la cursa è dentant fitg averta.
Autur: Michael Hermann Politolog da l'institut Sotomo

Il candidat senza partida Hans Vetsch na figurescha betg en la retschertga, cunquai ch'el ha dà enconuschent sia candidatura pir ils 11 d'avrigl, pia suenter la retschertga.

Da 3,3 enfin 4,2 per ils cussegliers guvernativs en uffizi

Las participantas ed ils participants da la retschertga han er pudì valitar la lavur d'enfin uss dals trais cussegliers guvernativs en uffizi. Er questa valur correlescha cun la rangaziun. La megliera nota fa Marcus Caduff, suandà da Peter Peyer e sin plazza trais Jon Domenic Parolini. Las notas da 4,2 enfin 3,3 na sajan betg da cumparegliar cun notas da scola. Ina nota sur in da 4 saja ina buna, di il politolog Michael Hermann.

Grafica cun notas per ils trais cussegliers guvernativs en uffizi.
Legenda: Notas per ils trais cussegliers guvernativs en uffizi. RTR

Trais novs sin donn e cust da Jon Domenic Parolini

La finamira da l'Allianza dal Center è da defender dus sezs e remplazzar Mario Cavigelli en la regenza. Tenor la retschertga pudess quai reussir a Marcus Caduff e Carmelia Maissen, però vegnir stretg per Jon Domenic Parolini. Entant che Carmelia Maissen po quintar cun sustegn da la sanestra, reussescha quai pli pauc a Parolini da recaltgar vuschs d'autras partidas. Jon Domenic Parolini di ch'i na saja nagina supraisa per el – el haja quintà d'esser ensemen cun Roman Hug sin las davosas plazzas. La retschertga saja dentant er da relativar sis emnas avant las elecziuns, ma quai dettia er motivaziun per far cumbat.

Jau sun stà pli pauc en la publicitad ch'auters candidats. Sche, lura sun jau stà preschent cun decisiuns pauc popularas sco mascrinas en scola.
Autur: Jon Domenic Parolini Cusseglier guvernativ

Ch'ir cun in ticket da trais en il cumbat saja forsa stà in sbagl, na vesa il manader dal cumbat electoral da l'Allianza dal Center Kevin Brunold betg uschia. La retschertga saja in'impressiun dal mument, la fasa decisiva vegnia pir uss. Brunold è persvadì che Jon Domenic Parolini haja fatg buna lavur en la regenza e ch'el vegnia da far valair quai.

video
Cursa stretga per la regenza – Jon Domenic Parolini sto tremblar
Or da Actualitad video dals 13.04.2022.
abspielen. Laufzeit 2 minutas 47 Sekunden.

Er ils dus candidats novs Martin Bühler e Roman Hug vegnessan da recaltgar in sez en il gremi. Martin Bühler - ch'è vegnì enconuschent durant la pandemia sco manager da crisa - fa tenor la retschertga vuschs sur tut las partidas.

Retschertga da Sotomo

Avrir la box Serrar la box

La retschertga è vegnida fatga tranter ils 28 da mars enfin ils 4 d'avrigl 2022 e quai via las paginas d'internet dad RTR e Somedia e cun in panel online da Sotomo. En tut èn vegnidas dumandadas 1'888 persunas.

Damai che la candidatura da Hans Vetsch è vegnida enconuschenta suenter la retschertga, ils 11 d'avrigl, n'è el betg resguardà.

La quota da malsegirtad munta a +/-2,6%.

Dossier online

Avrir la box Serrar la box
Dossier online

Sin in clic tut davart las elecziuns grischunas.

RTR novitads 17:30

Artitgels legids il pli savens

Scrollar a sanestra Scrollar a dretga