L’anteriur president da vischnanca e cusseglier communal actual Guido Schenini sa retira per immediat da ses uffizi e tut sias posiziuns. El saja dapi mais malcuntent cun la situaziun actuala, ha Schenini scrit en ina brev averta, rapporta RSI.
Dapi plirs mais è la situaziun per mai malempernaivla, plain cunflicts e motivaziun che patescha. Quai uschia ch'i surpassa ils cunfins da quai ch'jau poss suportar.
Il schaner 2021 aveva il chantun incumbensà l’anteriur cusseglier guvernativ Claudio Lardi sco cumissari da la regenza per la vischnanca. Dapi lura ha lez surpiglià las incumbensas da manar la vischnanca da Guido Schenini. Quai pass ha fatg la regenza, suenter che la suprastanza communala ed il president na parevan betg da sa chapir, uschia che la collavuraziun saja stada nunpussaivla.
Il november 2020 aveva la regenza grischuna decidì da prender neginas ulteriuras mesiras. Quai suenter il rapport da la cusseglier naziunala e da lezzas uras cumissaria per Roveredo Anna Giacometti. Ella aveva concludì che la situaziun politica saja sa calmada, però anc fragila.
La stad 2020 aveva la regenza gia constatà che Roveredo na vegnia betg da surmuntar la crisa instituziunala. Lura aveva la regenza clamà clamà la cussegliera naziunala Anna Giacometti per intermediar, cussegliar ed accumpagnar la vischnanca.
Quai n'è betg stà las suletta giadas che la regenza è intervegnida. L'emprima giada il 2013 è la regenza intervegnida ed ha installà in mediatur che dueva intermediar. Quai suenter ch'il president da lezzas uras ed ina part da la suprastanza avevan demissiunà per immediat.
