Siglir tar il cuntegn

Header

cuntegn

Politica d'ambient Iniziativa parlamentara per reducir il privel da pesticids

Ils ristgs ch’il diever da pesticids porta per fauna e flora duain vegnir reducids. Quai vul la cumissiun d’economia dal Cussegl dals chantuns. Ella ha tramess oz en consultaziun in’iniziativa parlamentara correspundenta.

Proteger l'aua e la natira

Reducir il diever da pesticids vul era il Cussegl federal. Quai dentant a moda voluntaria e senza finamiras concretas. Gist quai crititgeschan però ils commembers da la cumissiun d'economia da la Chombra pitschna. Cun l'iniziativa parlamentara vulan els perquai francar en la lescha ina reducziun da 50% dal privel per las auas e per il spazi da viver d'organissems – e quai fin en set onns.

Pertutgads fissan purs e privats

Pertutgads da quellas mesiras fissan tant l'agricultura sco era privats. Na vegn la finamira betg cuntanschida, duai il Cussegl federal instradar mesiras: Per exempel scumandar tscherts pesticids ubain imponer taxas directivas sin quels.

La proposta stat en connex cun duas iniziativas. Omaduas van probabel anc quest onn en votaziun. L'iniziativa dals pesticids vul scumandar quels e l'iniziativa per l'aua da baiver vul che purs survegnan mo lu subvenziuns, sch'els desistan tranter auter da pesticids.

RTR novitads 17:00