Trais gruppas da salamuiras s'entaupan a Domat per l'emprova generala. Per l'emprima giada sa preschentan els avant publicum – probablamain il pli critic. Igl èn numnadamain ils collegas che taidlan in l'auter e quai è lura l'emprova, schebain l'humor funcziuna. Sco i para è quai gartegià. La gruppa Buccas bletschas cun André Niedermann raquinta ch'il temp da sa preparar e scriver las salamuiras saja in fitg legher e bel temp.
Tut quai che nus avain scrit e discutà na dastgassan nus strusch chantar e preschentar ina giada.
Ils giuvens tranter ils collegas da salamuiras è la gruppa dals Kakalaris, els na sajan chanticamain probabel betg uschè ferms sco auters collegas a Domat che sa preschentan cun salamuiras, dentant possian els era persvader cun versets. Era els partan ora bleras piztgadas e giaudan fitg il temp da tschaiver e da cumpagnia.
Tar ils dus collegas dal Oergeli Duo è la situaziun in pau speziala: Durant ils davos onns han els numnadamain fatg ina pausa. Sin dumonda èn els ussa puspè stads pronts da sa preschentar. La tensiun saja bler pli gronda che avant onns, di Dieter Federspiel. El ed Adriano Kollegger èn stads avant onns iniziants da las salamuiras a Domat.