Ils medis da chasa che stattan a disposiziun set dis l’emna en lur praticas singulas èn tenor studis actuals models antiquads. Per remplazzar quels en l'avegnir fai da basegn da novas soluziuns, cunzunt en regiuns periferas.
Il medi en la pratica singula vegn a murir or.
Tenor Yvonne Gilli, presidenta da l’Uniun da medis svizra possian dapli praticas communablas, lavur parziala e l'uschenumnada «interprofessiunalitad» esser ina part da la soluziun. In concept che descriva squadras da persunal medicinal e medis cun differentas cumpetenzas che cumpletteschan ina l’autra.
Impurtant è il provediment ambulant
Tge che saja vinavant impurtant per pazientas e pazients saja in bun emprim provediment ch’è accessibel. Senza quel giaja la glieud davent da las regiuns. Las diagnosas en cas betg ambulants possian dentant er vegnir fatgas cun agid da la digitalisaziun. La savida da spezialistas u medis na stoppia numnadamain betg adina esser damanaivel a pazientas e pazients.
Quai ch’era pli baud en il scussal dal medi pon ins oz far per part sin distanza.
Cussegliaziuns sin via virtuala
Thomas Krech, CEO da «MiSANTO» che porscha ina app da consultaziuns digitalas, è segir che cussegliaziuns virtualas vegnian en l'avegnir ad avair ina pli gronda impurtanza. Enfin il 2030 duai dar en Svizra numnadamain ina fora da 10 milliuns consultaziuns. Tenor il medi duain consultaziuns digitalas pudair cuvrir 70% da questa fora. Las apps possian cun ina cumbinaziun da savida umana ed intelligenza artifiziala far gia diagnosas presumadas ed eruir ordavant, sch’in pazient ha in problem urgent.
Er las datas da pazientas duain vegnir digitalisadas
Il dossier da pazients electronic, curt EPD, duai ramassar e digitalisar las datas da pazientas e pazients en in lieu. Quel duai lura esser accessibel independentamain dal temp e lieu. Uschia possian per exempel spezialistas e spezialists avair access a las datas en cas urgents sco accidents. Quai è almain il plan da l’uniun «eSanita». Arnold Bachmann, president da quest’uniun, di ch’i saja impurtant da savair che las datas tutgan al pazient e fissan uschia pli bain accessiblas ch'en furma analoga en l'archiv d’in medi da chasa.
Las datas tutgan al pazient e duain esser accessiblas 24/7.
Sper las sfidas da protecziun da datas saja dentant er impurtant da persvader pazientas e pazients. Ina tscherta disfidanza envers certificats digitals han ins gia pudì constatar tar la pandemia e qua vegnia ad esser sumegliant. Betg l'ultim gioga er la politica ina rolla en la dumonda, cura che talas purschidas èn funcziunalas per la massa. Tschertas soluziuns digitalas vegnian gia duvradas ed il dossier da pazients electronic duai vegnir lantschà il november en Grischun.