Siglir tar il cuntegn

Header

cuntegn

Sanadad publica Campagnas per ina populaziun pli fitta e pli sauna

Cun il concept da promoziun da sanadad vul il chantun Grischun promover la sanadad da la populaziun. Las trais pitgas centralas dal concept èn: Uffants e giuvenils, sanadad en la vegliadetga, e dependenza.

Peter Peyer en situaziun d'intervista
Legenda: Cun campagnas da trais pitgas vul il minister da sanadad grischun Peter Peyer promover la sanadad publica. RTR, Giana M. Cantieni

Il program da promoziun da la sanadad ha differents projects che duran mintgamai quatter onns. Il concept cumpiglia trais pitgas centralas:

  • in program per uffants e giuvenils,
  • per sanadad en la vegliadetgna
  • ed in encunter dependenza.

Las campagnas van sin ils pli differents chanals – sco per exempel acziuns cun flyers, medias socialas ni paginas d'internet.

audio
Fit e saun: Co il Grischun tegna fitta sia populaziun
ord Actualitad dals 27.01.2022.
laschar ir. Durada: 2 minutas 46 Secundas.
Igl è fitg impurtant ch'ils uffants hajan in bun start en la vita. In bun start augmenta las schanzas ch'ins ha era suenter ina buna vita e n'è betg gia dal cumenzament dischavantagià.
Autur: Peter Peyer minister da sanadad dal Grischun

Far attent ed augmentar attentivitad

Cun l'acziun cun bancs mellens vulan ins per exempel far attent la glieud sin la sanadad psicica. Sin ils bancs era scrit la dumonda: «Co vai cun tia?». L'intenziun da l'acziun saja stà, che la glieud sa tschenta sin il banc e cumenza a discurrer. Gist tar malsognas psichicas saja quai fitg impurtant, perquai che quellas na sajan betg visiblas sin l'emprim'egliada.

Gia cun pitschnas chaussas, sco per exempel ir stgalas enstagl da prender l'ascensur, pon ins midar insatge. Cun pitschnas chaussas pon ins mover insatge grond.
Autur: Peter Peyer minister da sanadad dal Grischun

Natiralmain saja quai uschia che las acziuns sajan ina giada a fin e giajan en emblidanza. Alura stoppian ins clamar en memoria las acziuns ubain lantschar ina nova campagna. Quai saja sco cun la sanadad sezza, di Peter Peyer, ins stoppia guardar da betg perder il fil.




Quant fit che cusseglier guvernativ e minister da sanadad Peter Peyer è …

audio
Fit e saun: Quant fit ch'il cusseglier guvernativ Peter Peyer è
ord Actualitad dals 27.01.2022.
laschar ir. Durada: 2 minutas 56 Secundas.
video
Power Peyer – Quant fit è Peter Peyer, minister da sanadad?
Or da Giuventetgna dals 26.01.2022.
laschar ir. Durada: 2 minutas 40 Secundas.

RTR actualitad 07:00

Artitgels legids il pli savens