Sin la via dal Bernina sa tracti d'in traject da bun 1,7 km lunghezza a Poschiavo tranter Sfazù e l'entrada a la Val di Campo. Dapi ils onns 1970 cura che la via è vegnida schlargiada sin sis meters hajan ins bè pli fatg lavurs da mantegniment. Pervi dal quantum da traffic sco er la construcziun plitost flaivla saja la via uss en in schlet stadi. Sper la sanaziun da la via duai er vegnir realisada in vial per velos da la vart sura cunter la spunda. Il project vegn coordinà ed adattà a pliras pitschnas adattaziuns communalas da la vischnanca da Poschiavo sco p. ex. ina plazza da parcar publica ed in insla per peduns. Tut en tut muntan ils custs a 31,3 milliuns francs.
Via da Val vegn schlargiada
Sin il traject tranter la galaria Camp ed ils bajetgs da las Auas mineralas da Val duai la via vegnir sanada e schlargiada sin sis meters ladezza. Ultra da quai duai dar ina nov passapeper lung da la via. Da principi tutgan passapes tar las cumpetenzas da las vischnanca. En quest cas surpiglia il chantun sin incumbensa da la vischnanca però tut las lavurs en connex cun il project. La cumpart per il passape da bun 400'000 francs surpiglia però la vischnanca. Tut en tut custa il project 3,5 milliuns francs.
Via a Seraplana vegn renovada cumplettamain
La via Seraplana che sa chatta tranter Ramosch e Tschlin colligia la via d'Engiadina cun il lieu Seraplana. Questa via da colliaziun chantunala na correspundia cun sia cuvrida simpla betg pli al standard actual. Perquai lubescha la regenza uss il project da sanaziun per il tschancun da bun 720 meters. Ultra da quai vegn construì sin giavisch da la vischnanca Valsot ina via da peduns fin tar la fermada da bus a la via d'Engiadina. Il project custa totalmain radund 2,27 milliuns francs.
