La vischnanca da Schiers dastga construir rempars per il flum Schraubach. La regenza grischuna ha approvà il project e sa participescha cun radund 130'000 francs als custs totals da 530'000 francs. En il rom da las inspecziuns regularas eri sa mussà ch'ils rempars existents èn donnegiads en il territori, nua ch'il Schraubach sbucca a Landquart, uschia communitgescha il chantun Grischun.
Il Schraubach valeva ditg sco in dals torrents ils pli privlus dal Partenz. Gia 1910 han ins cumenzà a construir rempars. Dapi lura han ins periodicamain amplifitgà e renovà ils rempars. Per garantir vinavant la protecziun cunter aua gronda ston ins uss reparar differents donns vid la construcziun. Cun quest project vegnan era la la via da la Chlus e la via da Stels protegì.
