Da cultivar plantas ch’èn manipuladas geneticamain è scumandà en Svizra. Excepziuns datti mo per la perscrutaziun e là mo sut cundiziuns strictas. Il 2005 avevan passa 55 pertschient da las Svizras ed dals Svizzers ditg gea a l'iniziativa per in'agricultura senza tecnica genetica. E dapi lura ha il parlament prolungà quai moratori trais giadas. Mo ussa, cura ch'i va da prolungar la chaussa enfin la fin dal 2025 datti resistenza ord il Cussegl dals chantuns. I saja ussa temp da differenziar e da lubir tschertas metodas ha la Chombra pitschna decis fitg stretg, culla vusch da tagl dal president.
Sustegn er or dal Grischun
Sustegnì l'avertura ha era il Cusseglier dals chantuns grischun Martin Schmid da la PLD. Ils ultims 15 onns haja la tecnologia genetica fatg immens svilups. La metoda da la uschenumnada forsch genetica saja vegnida undrada cul premi Nobel e porschia novas schanzas per in'agricultura persistenta cun pli paucs pesticids. Era per la Svizra sco lieu da perscrutaziun fissi impurtant da pudair lavurar cun quellas metodas novas. Da betg far quai fissi in sbagl cardinal, di Schmid.
Cun questa metoda pon vegnir sclausas per gronda part las ristgas da plantas modifitgadas geneticamain. Ord mia vista fissi ina schanza manchentada, era ord vista da l’ambient, sche la Svizra na sa participescha betg a questa tecnologia.
Nagin stress tar la sanestra
Surstada da la decisiun piz a cup dal Cussegl dals chantuns è la cussegliera naziunala Sandra Locher Benguerel. Era la chombra gronda na saja betg categoricamain cunter il svilup scientific el sectur da l'agricultura. Ella, e cun ella era ina clera maioritad dal Cussegl naziunal, sajan dentant dal maini che quai na dastgia betg succeder a la sperta.
Nus stuain nizzegiar ils proxims quatter onns dal moratori per examinar precautamain nua ch’ins pudess eventualmain schluccar il moratori. Jau ves il pass ch’il Cussegl dals chantuns fa sco memia baud. Quai e per mai ina part da las examinaziuns che duain vegnir fatgas ils proxims quatter onns.
Tranter stgir e cler
In zic tratgs vi e nà è Thomas Roffler, il president da l'Uniun purila grischuna. Era sche la pli gronda part dals bains purils el Grischun vivian da la producziun da latg e da charn saja il cultivar ils ers e las vignas in sectur ch'ins na dastgi detg negliger el Grischun. E per lez commembers vesess el in cler avantatg d'eventualas novas sorts.
Quai che fiss segir da beneventar fiss ch’ins avess sorts che pudessan resister meglier als parasits uschia ch’ins pudess reducir il diever da pesticids.
Il squitsch da duvrar pli paucs pesticids creschi ed era ils consuments sajan pli pretensius. Mo gist tar ils consuments sa dumonda el sche lez acceptian era tals products. Qua è Roffler fitg sceptics.
Questa dumonda sto vegnir sclerida fitg exact e betg simplamain far in’emprova a bun gartetg.
Mo uschè spert na vegn quai betg ad ir. L’emprim sto ussa anc ina giada il Cussegl naziunal sa fatschentar culla dumonda. Quai probabel ella sessiun da primavaira il favrer 2022.
