La survista è unica, ins vesa davent dal Calanda lunsch giu en la Val dal Rain, sur Valendau e la gruppa dal Signina cul Pez Fess, ed enfin il Pez Mundaun cun Surcuolm e Sursaissa. Natiralmain han ins davent dal crap era ina bellezza vista sin Sagogn.
In'idea nascha
Cun quai ch’il crap, ch’è franc 15 enfin 20 meters auts, n’ha giu nagin tschabargal, era il privel dad accidents memia gronds. Ultra da quai è il crap, malgrà sia grondezza e sia posiziun sper la via natirala da Sogn Giacun, in zic zuppà. Uschia ha Hans Niederberger da Sagogn giu l’idea, da construir ina plattafurma per il Crap Signina.
Avant rodund in mais è la plattafurma lura vegnida inaugurada, uschia che pitschen e grond sa giudair uss la survista sur Sagogn e sur l’entira vallada. Per Hans Niederberger è la plattafurma in punct da ruaus cun ina sort in caracter spiritual.
Purtà ils custs cuminaivlamain
La plattafurma ha custà 120'000 francs. La vischnanca e l’Uniun da traffic da Sagogn han partì ils custs cun la vischnanca da Laax, perquai ch’il cunfin tar Laax è mo in per meters sur il crap Signina. Uschia profiteschan il turissem en omaduas vischnancas.