Schais. Il stgarp enorm en la muntogna penda sco ina spada da damocles sur la vischnanca da Sta. Maria.
Tenor l'inschegner forestal da la Val Müstair Hansjörg Weber èsi dentant da savair che il privel da bovas fitg grondas che vegnissan giu da la muntogna n'è betg uschia grond pervia ch'i manca l'aua sin la muntogna. Quai vul dir ch'i na dat betg auals che mainan en il stgarp da Schais. Sche i plova ferm arriva be l'aua da la costa en il territori dal stgarp. Il stgarp è uschia grond pervia che fitg bler material è en moviment. 250'000 meters cubic tenor las mesiraziuns dals responsabels. En il territori da Schai datti bler crap da gip, perquai era il num "Schais" e perquai la colur fitg clera dal stgarp.
En la vischnanca Fa il stgarp da Schais ina apparentscha spectaculara cun quai ch'el è posiziunà gist sur la vischnanca. Ins vesa fitg bain Schais davent da las chasas da la vischnanca. Perquai dumondan ils giasts da vacanzas savens sche i na saja betg privlus da viver a Sta. Maria.
Hansjörg Weber di che il rpivel da bovas è qua per Sta. Maria. Ma las bovas che vegnan giu da Schais en normalmain pitschnas, perquai ch'i ha apunto memia pauca aua en il territori per transportar fitg bler material en ina giada a val. E las mesiras da segirtad èn grondas. In chanal cun in grond rempar duai manar davent il material che bovas portan.
La davosa giada che ina bova da Schais ha fatg grond donn a Sta. Maria è stà l'onn 1926. Dapi lura n'hai betg pli dà ina bova da Schais che avess fatg donns pli gronds. La stad passada per exempel hai dà radund 4 bovas giu da Schais. Nagina da quellas ha dentant fatg dons en vischnanca.
