Els sajan adina stads loials e gentils cun ella. Ella na sappia en scadin cas betg sa lamentar.
Acla Glierauns in lieu cun bleras regurdientschas
Schon da pitschna è Anna Bundi stada bler sin l’acla Glierauns sur Curaglia si. In’acla cun ina bella vista vers Mustér e sin il culm il pli enconuschent en Val Medel, il Muraun. In’acla ch’è dentant er sa midada – e quai pervia dil vent d’orcan Vivian ch’ha derschì l’entir guaud da protecziun sur il vitg da Curaglia. Ed uschia er l’entir guaud enturn l’acla da Glierauns, Anna Bundi sa regorda anc bain co quai veseva or avant l’onn 1990, avant ch’il Vivian è vegnì.
Il pass dil Lucmagn cun il lai da Sontga Maria
Il pass Lucmagn che collia la Val Medel cun la Val dal Blegn en il Tessin è enconuschent er pervia da ses lai da fermada ch’è vegnì construì ils onns 60. L’emprim è la via sur il pass vegnida dischloccada, uschiglio fiss quella uss inundada uschia Anna Bundi. Lura èn il vegl ospizi e la veglia chaplutta vegnids stgarpads giu ed il mir ed il nov ospizi orasum il lai èn vegnids construids. Il lai da fermada è ina buna chaussa per ils Medelins, uschia Anna Bundi. Cunzunt finanzialmain ha quai ina gronda influenza sin la pitschna vischnanca muntagnarda.