Si Craps ed a Bubretsch cun Isidor Pelican

Craps è in mises in tochet sur il vitg da Surrein. Isidor Pelican (85) va anc oz magari si Craps. Spezialmain il matg, ed era cura ch’igl è da far fain, vegn el gugent siadora. L’emprima giada è el stads sco giuven buob si Craps.

Davent da Craps han ins in survista dal tuttafatg speziala sin Surrein. Ins vesa numnadamain l’entir vitg, perfin l’entira vischnanca da Sumvitg.

Sche Isidor Pelican mira giu sin il vitg da Surrein, constatescha el che bler saja sa midà ils davos decennis. «Igl è perfin sa midà uschè bler, ch’ins po far la dumonda: Tge n’è betg sa midà?»

«  Igl è il pli bel lieu per contemplar il vitg da Surrein, ma era ils vitgs en la vischinanza. »

Isidor Pelican

Datti in pli bel lieu per contemplar Surrein?

Dapi ch’el sa regorda, èsi vegnì bajegià var ventg chasas en il vitg. Ina chasa da scola n’haja Surrein betg pli ed oz dumbria Surrein er gnanc pli 300 abitants. «Cura ch’jau gieva a scola, abitavan qua a Surrein anc bun 400 abitants.»

Tenor il bab e tat Isidor Pelican datti blers bels lieus, ma Craps è propi spezial per el: «Igl è il pli bel lieu per contemplar il vitg da Surrein, ma era ils vitgs en la vischinanza.»

Auas grondas a Surrein

Surrein ha era savens gì da cumbatter cun auas grondas pli baud. Isidor Pelican di che ses bab raquintava savens ad el, da la malaura il 1927. Spezialmain las auas che vegnivan or da la Val Sumvitg eran immensas. «Quai è stà tgunsch la gronda malura en quest tschientaner per Surrein.» Ma era els onns 50 haja il vitg savens giu da cumbatter cun auas grondas.

«  Bubretsch è atgnamain tut per mai. Jau bandun Bubretsch pir cura ch’jau mor. »

Isidor Pelican

Bubretsch è unic

Isidor Pelican è creschì si sin il bain puril a Bubretsch ch’è in zic or dal vitg da Surrein. Là abitescha el gia sia entira vita. «Bubretsch è atgnamain tut per mai», di l’um da 85 onns. Uschia manegia Isidor Pelican era cun in lev surrir: «Jau bandun Bubretsch pir cura ch’jau mor.»

Spezial è Bubretsch buc mo cunquai ch’i n’è betg direct en il vitg da Surrein. Spezial vi da Bubretsch è spezialmain era la chasa. «Quella è uschè veglia, che nagin sa propi con veglia ch’ella è», di Isidor Pelican. Mo veglia saja la chasa en mintga cas – pli probabel la pli veglia da l’entir vitg.

Il bain puril a Bubretsch: qua viva Isidor Pelican (85) dapi sia naschientscha. Avrir maletg en lightbox.

Legenda da maletgs: Il bain puril a Bubretsch: qua viva Isidor Pelican (85) dapi sia naschientscha.RTR, G. C. Candinas RTR, G. C. Candinas

Differents possessurs

La chasa a Bubretsch ha gì differents possessurs. Avant bun 200 onns abitava la renumada schlattaina De Contrin a Bubretsch. Dals De Contrins è il bain Bubretsch alura ì vi sin la famiglia Schmid, cunquai ch’il mistral Schmid da Sumvitg aveva alura maridà ina De Contrin. Dapi lura è la famiglia Schmid en il possess da Bubretsch. Ma Isidor Pelican abità gia sia entira vita A Burbetsch, in lieu che munta tut per el.