Scuvrir la Val Cluozza
Dario Clavuot (71) da Zernez ha lavurà sco guardian dal Parc Naziunal Svizzer. El enconuscha la Val Cluozza da tut las varts e cun tut sias istorgias. El mussa a nus e declera a nus, tge ch'è spezial vid la Val Cluozza.
Zernez - Prasüras – Bellavista – Fops – Chamanna Cluozza (ca. 3.5 h)
Smatga sin ils puncts cotschens per scuvrir la Val Cluozza.
Infos carta google
Zernez
Da Zernez davent cumenza la tura envers la Val Cluozza. Ina Val che mintga Zernezer sto avair vis.
Prasüras (sin 1'789 m.s.m.)
La via è stippa envers la Val Cluozza. Ma per cletg chatt’ins dapertut banchins per far ina pausa.
Bellavista (sin 2'039 m.s.m.)
A Bellavista han ins, sco quai ch’il num di, ina bella vista. Ins vesa vers Zernez e tut las muntognas enturn Zernez. Qua datti era ina chamona ch’ins po affittar.
Pli baud faschev’ins cursas da skis davent da la Chamanna Bellavista enfin giu Zernez. Però quai era fitg privlus, perquai che la via è stippa.
Bellavista è in lieu exponì. Qua datti adina puspè sajettas. E las sajettas che han dat en, ves’ins vi da la bostga.
Fops (sin 2'126 m.s.m.)
Fops è il pli aut punct sin noss viadi envers la Val Cluozza.
Inscuntrar l'urs
Ins raquinta in’istorgia dal temp cur che urs vivevan anc en la Val Cluozza. Sin l’alp Murter ch’ins vesa davent da Fops era pli baud il muvel. E per proteger il muvel dals urs giev’ins adina en dus sin l’alp a far in fieu.
In di era in dals dus malsaun, e lura ha l’auter stuì ir sulet a far il fieu. Sin viadi ha quel lura inscuntrà in’ursa cun ses dus pitschens. Or da reacziun ha el prendì ils dus craps per far fieu, e ha cloccà els in vi da l’auter uschia ch’i ha dat sbrinzlas e l’ursa é svanida cun ses pitschens. Svelt è el turnà en il vitg ed ha raquintà da l’inscunter. E betg da l’urs, mabain da l’anguscha è el alura mort.
Chamanna Cluozza (sin 1'882 m.s.m.)
Amez la Val Cluozza sa chatta la Chamanna Cluozza. La chamona è sin il territori dal Parc Naziunal Svizzer, ed i vegn ditg ch'ella saja il cor dal parc.
Pippo e Rebecca
Fin dal onn 1992 transportavan ins tut il material ch’ins duvrava en la Chamanna Cluozza cun in milet. Ils milets, sco per exempel il Pippo e la Rebecca, pasculavan lura ensemen cun ils tschiervs dasper la chamona. Uss sgola ina giada al mais in helicopter en la val, cun tut quai ch’ins dovra. E sch’insatge manca, port’ins savens era en la rauba a pe cun ina bulscha.
Piz dal Diavel (sin 3'062 m.s.m.)
Sin il Piz dal Diavel han ins chattà passivas da dinosaurs. Quels fastizs èn da vesair cun chaminar vers la Chamanna Cluozza.
Quattervals (sin 3'165 m.s.m.)
Sin il Piz Quattervals, ch’ins vesa cun chaminar en direcziun da la Chamanna Cluozza, vegnan ensemen 4 vals:
- Valetta
- Val Sassa
- Val Müschauns
- Val Tantermozza