Siglir tar il cuntegn

Header

video
Sessiun dal Cussegl grond è averta
Or da Telesguard dals 19.04.2022.
abspielen. Laufzeit 1 minuta 35 Sekunden.
cuntegn

Sessiun è averta Malgrà critica – nova basa da traffic po vegnir realisada

La sessiun d’avrigl dal Cussegl grond na porscha nagina gronda fatschenta, persuenter ina gronda variaziun da temas. Durant trais dis debatteschan deputadas e deputads quels.

La nova basa da traffic per la polizia chantunala a Cuira po vegnir bajegiada. Il Cussegl grond ha refusà la proposta da renviar la fatschenta a la regenza suenter ina lunga debatta.

Pliras partidas han crititgà ils plans da la regenza. Cun la nova basa da traffic a Cuira vegn la basa da traffic a Tusaun schliada, uschia giajan 15 plazzas da Tusaun a Cuira. Cunzunt ils deputads e las deputadas da la regiun han crititgà quest fatg. Dubis hai era dà pertutgant la segirtad da l'autostrada A13. Lezza stuessia la polizia lura garantir da Cuira anora, senza ina basa a Tusaun. Da cuntanscher ils tunnels da la Viamala u la Rofla cuzzass uschia pli ditg davent da Cuira, cunzunt sch'i dettia colonnas sco durant Pasca. In auter punct ch'è stà dispitaivel: la regenza calculescha cun custs da sut 10 milliuns francs, uschia na dovri betg ina votaziun da la populaziun. Singuls deputads e deputadas han manegià ch'ils custs da bajegiar sajan creschids dapi che la regenza haja fatg la calculaziun. Uschia ch'ins stuessia ussa quintar cun custs sur 10 milliuns francs e laschar decider il pievel sch'ins duai bajegiar la nova basa da traffic a Cuira u betg.

Malgrà grondas discussiuns e blers puncts dispitaivels ha il Cussegl grond acceptà cleramain il messadi e dà glisch verda al credit da 9,8 milliuns francs per la nova basa da traffic. Quai cun 88 cunter 17 vuschs e 3 abstenziuns. Las lavurs per la nova basa cumenzan uschia l'entschatta dal 2023 e la stad 2024 duai la basa lura esser pronta.

Pled d'avertura

La presidenta dal Cussegl grond Aita Zanetti ha avert la sessiun d’avrigl cun ponderaziuns davart l’Ucraina. Ella haja difficultads da chattar il dretgs pleds, sch’ella vesia che Ucranaisas ed Ucranais stoppian temair per lur vita e stoppian bandunar lur patria.

Las colurs blau e mellen stattan actualmain per in pajas che vegn attatgà da ses vischin e che sa dosta cun ils meds a disposiziun.
Autur: Aita Zanetti presidenta dal Cussegl grond

Tar nus effectueschia la guerra – sper dumondas davart segirtad e l’armada – er ina gronda solidaritad. E tut las acziuns da rimnar daners e dar suttetg a fugitivs, laschan sperar ch’ins na possia betg cuntanscher pussanza tras violenza, uschia Aita Zanetti.

audio
Quai spetga durant la sessiun da primavaira dal Cussegl grond
aus Actualitad vom 19.04.2022.
abspielen. Laufzeit 3 minutas 12 Sekunden.

Quai vegn tractà en il Cussegl grond

Sco prim sto il Cussegl grond s’occupar d’ina nova basa per il traffic da la Polizia chantunala: I va per in nov bajetg datiers da l’autostrada a Cuira-sid, che duai unir en l’avegnir las basas da Cuira e Tusaun. Deputadas e deputads ston deliberar in credit da bunamain 10 milliuns francs per la construcziun.

Pliras partidas han crititgà ils plans da la regenza. Cun la nova basa da traffic a Cuira vegnia la basa da traffic a Tusaun schliada, uschia mondian 15 plazzas da Tusaun a Cuira. Cunzunt ils deputads e las deputadas da la regiun han crititgà quest fatg. Dubis hai era dà pertutgant la segirtad da l'autostrada A13. Lezza stuessia la polizia lura garantir da Cuira anora, senza ina basa a Tusaun.

Da cuntanscher ils tunnels da la Viamala u la Rofla cuzzassia memia ditg danevt da Cuira, cunzun sch'ì dettia colonnas sco durant Pasca. In auter punct dispiteivel: la regenza calculeschia cun custs da sut 10 milliuns francs, uschia na dovria betg ina votaziun da la populaziun. Singuls deputads e deputadas han manegià ch'ils custs da bajegiar sajan creschids dapi che la regenza haja fatg la calculaziun. Uschia ch'ins stuessia ussa quintar cun custs sur 10 milliuns francs e laschar decider il pievel sch'ins duai bajegiar la nova basa da traffic a Cuira u betg.

Quels temas spetgan anc:

    • Co vinavant cun la chatscha grischuna ? Durant la chatsch’auta dal settember vegnan chatschaduras e chatschadurs gea quasi mai da sajettar tants animals sco previs.
    • Il chantun memia rigurus cun dezonar? La consequenza saja ch’i manchia terren da bajegiar en las vischnancas ed abitar vegnia pli char.
    • Sbassar taglias? Il chantun haja gea ina cassa plaina.

Tge capita cun dumondas ed incumbensas?

Las dumondas n’han nagina consequenza immediata. Mintga deputada e mintga deputà po far dumondas, che la regenza sto respunder. Auter tar incumbensas: Tar quellas datti mintgamai ina votaziun e sch’ina maioritad dal Cussegl grond sustegn la pretensiun, sto la regenza vegnir activa e realisar il giavischà.

En modus da cumbat?

Igl è l’ultima sessiun avant las elecziuns da regenza e parlament dals 15 da matg. Perquai èsi bun pussaivel che deputadas e deputads vulan sa profilar cun lur temas. I n’è dentant betg l’ultima sessiun dal parlament en questa cumposiziun: Il zercladur sa raduna il Cussegl grond per las ultimas debattas – il nov parlament cumenza lura l’avust sia lavur. La regenza grischuna resta en uffizi anc enfin la fin da l’onn.

RTR actualitad 12:00

Artitgels legids il pli savens

Scrollar a sanestra Scrollar a dretga