Siglir tar il cuntegn

Oceana en l'arena In magister e 120 scolars

Il scalin da scola ha sunà. Il president dal Cussegl grond, Duri Campell, beneventa ils 120 politichers. Il magister tegna il pled e metta paisa sin l’impurtanza da la sessiun «extra muros» ed ils scolars fan ir las sutgas, scutinan e rin.

la sala da sessiun en il center da congress ad arosa durant la sessiun
Legenda: Ils 120 deputads en la sala da congress ad Arosa l'emprim di da la sessiun ad Arosa. RTR, O. Galmarini

En scola dastga il scolar almain trair ora la giacca, cura ch'el ha chaud. Durant ina sessiun dal Cussegl grond è quai auter. Simplamain uschè trair ora la giacca dastgan ils parlamentaris lura betg. Ma per fortuna è il president tolerant ed agescha...

Sche quai è la moda e maniera durant la sessiun, lura sun jau stutta ch'il president na di betg insatge, sch'ils deputads èn vi dal telefonin. U schizunt, sch'il president dal Cussegl guvernativ, Martin Jäger, telefona en la sala. Davart tut quai hai jau stuì dumandar il president, Duri Campell:

Sco il magister en scola sesa il president dal Cussegl grond sisum. Sch'el discurra, lura vesan ins quai adina. Tar ils deputads n'has ti nagina schanza, sche ti n'enconuschas betg las vuschs. Sche ti has fortuna, lura vesas per cas gist quella persuna che far ir la bucca. Ma quai fan era blers auters en questa sala. Forsa vesas era gist il microfon che glischa cotschen. Uschiglio ston ins - sco jau - ballantschar vi e nà sin la sutga per chattar ora, tge vusch che tutga a tgi.

Ma sche vus avais pensà il medem sco jau - ch’i dat durant la sessiun discussiuns emoziunalas, 120 politichers che fan debatta e dispita en ina arena bunamain sco en il colosseum a Roma, ed il president che na sa betg pli, a tgi dar il pled - lura essas sa sbagliads sco jau. En il Cussegl grond n'è quai betg sco sin plazza da scola. Igl è vegnì preschentà 13 rendaquints. Facits, resultats e definitivamain memia bleras cifras. Suenter mintga rapport da la cumissiun da gestiun han ils deputads la pussaivladad d’era dir lur opiniun. Mo darar s’annunzia insatgi. È quai forsa «uncool»? E sche, lura para quai dad interessar nagin. Era suenter la pausa numna il president posts dal quint annual dal chantun Grischun 2014. Ils deputads dastgan far remartgas u dumondas.

Uschia va quai anc uras. Insacura vegn era il president ad esser vegnì avant in pau pluffer ed aveva sez il scuffel.

El para dad esser levgià, cura che il leger giu piglia ina fin, ed il scalin da la scola suna puspè - e sco quai ch’i tutga tar scolars:

Legende: Video La sessiun ad Arosa suenter il sunar dal scalin... abspielen. Laufzeit 0:15 Minuten.
Dals 15.06.2015.

Jau ma legrel sin damaun. I vegn elegì il nov president dal Cussegl guvernativ. Ed elecziuns da presidents èn bain adina interessantas?