Siglir tar il cuntegn

Oceana en l'arena Yeah, elecziuns!

Jau pens vi dal president dals Stadis Unids, vi da noss cussegliers federals e vi da las elecziuns dal parlament looctober. Adina in mega “tamtam”, ma era fitg interessant. Tgi da quels 5 cussegliers guvernativs vegn il nov president. Resta Martin Jäger? Tgi dat tras la tariffa?

Cura ch'il program per la sessiun ad Arosa è ora, hai jau marcà il punct: "Elecziun da la presidenta u dal president da la regenza e da la vicepresidenta u dal vicepresident da la regenza per l'onn 2016". Damai savess era ina dunna daventar presidenta.

Gist il cumenzament dal segund di vegn il pli impurtant: numnadamain l’elecziun. Quai vegn ad ir in mument - pens jau. Ils cussegliers guvernativs guardan ora magari calm. Betg mal. Ma l’emprima dischillusiun suonda svelt.

Tge? Il cusseglier guvernativ e vicepresident Christian Rathgeb? E mo el? Nagin cumbat per vegnir president tranter ils cussegliers guvernativs? Ils cedels per vuschar vegnan scumpartids. Zacbumm, suenter paucas minutas èsi cler.

Per mintgin eri atgnamain cler ch'il vicepresident vegnia president. Mo per mai betg. Daco insumma lura vuschar? Ins fa, perquai ch’ins fa. Tranter ils cussegliers guvernativs datti in princiip da collegialitad. Vul dir: Tut ils cussegliers guvernativs èn eguals. E mintgin vegn oramai a stuair ina giada crair vidlonder e manar las sesidas dals cussegliers guvernativs ubain tegnair vi la fatscha. Quai sa numna represchentar il cussegl guvernativ. E proxim onn è quai damai Christian Rathgeb. El sa legra.

Displaschaivlamain na vegni gnanca chantà per il nov president dal cussegl guvernativ. Auter è quai, cura ch'il president dal cussegl grond vegn elegì l'avust lu schon. Perquai han oz 9 deputadas e 12 deputads - cumprais dirigent - trenà. Tschels 98 deputads na eran betg là.

Puh, forsa po Christian Rathgeb esser cuntent ch’i na vegn betg chantà per el. Nausch, jau sai. Da la qualitad vul jau gnanc reclamar. Ma quel stil da chanzuns en cumbinaziun cun lirica sco per exempel “Solem ruaus, ruaus cheu silla riva, d’umbriva stat il lag curclaus, il bi sulegl...”, ed uschia vinavant. Jau na sai betg.

Ma era sch' igl è si magari pulvra sin ils figls na nota; è quai tut insaco era in pau charin.

Dal Famus e Glorius