Siglir tar il cuntegn
cuntegn

Setgira Agid Svizzer per la Muntogna sustegna transports d’aua

La fundaziun l’Agid Svizzer per la Muntogna surpiglia la mesadad dals custs per transports d’aua sin alps sitgas. Per quest intent ha l’Agid da muntogna previs in mez milliun francs.

In helicopter prenda si aua dal Lai da Gruyere per furnir aua sin alps sitgas.
Legenda: In helicopter prenda si aua dal Lai da Gruyere per furnir aua sin alps sitgas. Keystone

En Svizra vegn registrà ina da las stads las pli sitgas. Tenor Meteo Svizra hai sulet anc dà trais periodas ch’eran pli sitgas che l’actuala e quai dapi il cumenzament da las mesiraziuns il 1864. En las muntognas manca uschia la plievgia che croda per regla entaifer dus mais. La mancanza da la plievgia e las temperaturas autas han per consequenza che funtaunas han pauca aua ed il terren sienta ora. Ed il basegn d’aua sin las alps è auts, ina vatga dovra mintgadi dapli che 100 liters.

Transports d’aua èn chars

Per pudair transportar aua sin alps dovri sgols da helicopter. L’Agid da muntogna svizra porscha uss ad alps che ston laschar far tals transports da sustegnair ils custs. Normalmain sustegnia la fundaziun projects ch’èn orientads vers il futur, scrivan ils responsabels da la fundaziun. Ma ella haja temporarmain midà la strategia pervi da la situaziun precara tras la setgira.

RR novitads 12:00