Siglir tar il cuntegn
Inhalt

Setgira Alarm da chalira per parts dal Grischun

Er ils proxims dis na duessi tenor las prognosas da SRF Meteo strusch plover. Uschia dastgass la quantitad da plievgia restar pitschna fin mez avust. L'Uffizi federal per meteorologia ha dà ora in alarm da chalira – er per tschertas parts dal Grischun.

Ils proxims dis èsi da quintar cun temperaturas da fin 35 grads.
Legenda: Ils proxims dis èsi da quintar cun temperaturas da fin 35 grads. Keystone

Curt e concis:

  • L'alarm da chalira vala per la regiun da Cuira, la Tumleastga, il Partenz dador ed il sid da la Val Mesolcina.
  • Igl è da quintar cun temperaturas da passa 35 grads ed era la notg na van las temperaturas betg sut 17 grads.
  • I vegn cusseglià d'evitar lavurs grevas e da baiver bler. Anc enfin almain mez avust n'è nagina plievgia en vista.

L'alarm vala per la regiun da Cuira, la Tumleastga, il Partenz dador ed il sid da la Val Mesolcina. Betg pertutgads èn l'Engiadina, la Surselva ed il Grischun central. Ils experts cusseglian da restar en la sumbriva e d'evitar lavurs grevas e da baiver bler. L'alarm vala fin almain sonda ils 4 d'avust.

Dapi la dumengia vala gia in alarm da chalira per las regiuns da Basilea, Genevra e parts dal Vallais e dal Tessin.

Temperaturas da fin 35 grads

A partir da quest'emna èsi da quintar cun temperaturas da fin 35 grads, uschia las prognosas da SRF Meteo. Er la notg na mussa il termometer en questas regiuns betg sut 17 grads. Schizunt en ils auts vegni chaud. Sin 2'000 meters sur mar quintan ils meteorologs cun fin 20 grads. Temperaturas sut 0 grads datti tenor prognosa pir sur 4'500 meters.

La plievgia lascha vinavant spetgar

Sulettamain en las muntognas poi dar pitschens urizis. Uschiglio saja da quintar che la quantitad da plievgia restia minimala fin mez avust. La plievgia da questa fin d'emna haja quietà be localmain la situaziun. Sco p. ex. en Val S. Pieder nua ch'i ha dà bunamain 30 mm plievgia. La gronda part da quest'aua saja però gia puspè svapurada.

Per consequenza pudess la situaziun da la setgira anc daventar pli acuta.
Ils purs na dastgan gia ussa betg pli prender aua ord tscherts flums e dutgs.
Blers flums mainan il mument numnadamain uschè pauca aua sco dapi ditg betg pli.

Er il livel da l'aua en ils lais da Constanza, da Zug e dals quatter chantuns è uschè bass sco l'ultima giada il 1949. En plirs chantuns appelleschan las autoritads plinavant da spargnar aua.

Legende: Video Alarm da chalira: Co statti cun las reglas per ila lavurers da construcziun? abspielen. Laufzeit 02:01 Minuten.
Or da sil punct dals 31.07.2018.

Cura che la plievgia manca ...

Cura che la plievgia manca ...

Qua chattais tut davart la setgira en il Grischun.

RR novitads 10:00