Siglir tar il cuntegn

Setgira «Mintga di senza plievgia munta dapli problems»

L’Uniun purila svizra ha decis pervi da la setgira extrema emprimas mesiras. En il center stat da segirar il provediment da pavel sco era da mussar solidaritad entaifer la branscha e la chadaina da producziun, scriva l’uniun.

Per part mancan il fain ed ils purs ston vender lur vatgas. L'Uniun purila pretenda solidaritad.
Legenda: Per part manca il fain ed ils purs ston vender lur vatgas. L'Uniun purila pretenda solidaritad. Keystone

Dapi mais manca la plievgia ed er ils urizis ch’èn vegnids regiunalmain fitg different n’han betg pudì meglierar la situaziun. En tscherts lieus saja era scumandà u almain limità da sauar il funs. E cun mintga di senza plievgia vegnia la situaziun pli precara. Surtut il provediment da pavel e da garantir ch'avunda pavel saja avant maun per l'enviern, saja il mument ina gronda sfida per ils purs. Uschia dettia quai actualmain plirs purs ch’hajan stuì dar a maz animals ed il martgà saja per part surchargià.

Mesiras internas en la branscha

Per pudair garantir la furniziun da fain e pavel sitg, duajan purs cun avunda fain porscher quel sin il martgà e plazzar quellas purschidas sin las bursas da pavel da las uniuns chantunalas, scriva l’Uniun purila svizra. Era duajan purs ch'han la pussaivladad da prender si ulteriurs animals durant l'enviern annunziar quai ad uras per ch'ils chantuns possian coordinar las purschidas.

Dapli solidaritad

En la branscha duajan ils purs mussar dapli solidaritad ed era betg nizzegiar questas stretgas per far gudogns, scriva l’Uniun purila. Surtut las mazlarias na duajan betg nizzegiar a moda negativa la situaziun e sbassar ils pretschs per muvel, sco gia capità l’emna passada, accentuescha l’Uniun purila svizra.

RR novitads 17:00