Siglir tar il cuntegn

Setgira Ovras idraulicas en fora da producziun

Lais e flums portan pli pauca aua. Perquai produceschan las ovras idraulicas pli pauc forza electrica. Cun mancanzas na sto ins dentant betg quintar.

Ovra idraulica a Claustra.
Legenda: Pli pac'aua, pli pauca forza – fitg simpel. Keystone

«Nus producin per il mument 20 fin 25% pli pauca forza electrica», di Thomas Grond, pledader da medias da la Repower. Ils lais e flums portan pli pauca aua. Plinavant na lieuan ils vadretgs betg uschè ferm il mument. Damain aua vul era dir damain forza.

Era tar las ovras pli pitschnas vesi ora sumegliant. Per exempel tar l'ovra electrica Susasca a Susch (OESS-SA). Tenor il mainagestiun Giancarlo Neuhäusler produceschan els dapi circa dus emnas circa 15% damain forza electrica.

Ouvra Electrica Susasca Susch SA enchaschament La Jenna.
Legenda: Ovra electrica Susasca Susch SA enchaschament La Jenna. MAD

Mo ina pitschna fora

Sch'ins guarda sur tut l'onn, na vesi betg ora mal cun las ovras idraulicas. L'enviern ha purtà blera naiv. Quella è luada durant la primavaira. Blera aua, vul dir blera forza electrica.

Il mument producin nus pli pauc. Sch'ins guarda dentant sur tut l'onn, avain nus producì 25% dapli ch'ils auters onns.
Autur: Giancarlo NeuhäuslerMainagestiun OESS-SA

Sumegliant guardi er or tar las ovras da la Repower. Tenor Thomas Grond han els fin uss producì 15% dapli forza ch'ils onns avant durant il medem temp. Per il mument saja quai mo ina pitschna fora.

Fora ha nagina influenza

Ch'i vegn producì 15 fin 25% pli pauc n'è betg gravant. Quai ch'ins producescha betg en Grischun, vegn dad auters chantuns u pajais. «Las lingias da forza electrica n'enconuschan nagins cunfins», uschia Thomas Grond.

Sin il pretsch da la forza electrica per persunas privatas n'ha quai era nagina influenza. Mo en il martgà liber varieschan ils pretschs. Cun quai ch'els produceschan pli pauc, saja il pretsch per il mument pli aut, di il pledader da la Repower.

RR Actualitad 07:00