Siglir tar il cuntegn

Setgira Setgira – Purs survegnan sustegn da la Confederaziun

La Confederaziun vul sustegnair ils purs per evitar donnas tras la setgira actuala. Concret duajan ils dazis per la cumpra da pavel sitg vegnir reducids. Cusseglier federal Johann Schneider-Ammann ha incumbensà l'uffizi federal per agricultura da prender las mesiras necessarias.

Blers ers en Svizra èn il mument sientads ora.
Legenda: Blers ers en Svizra èn il mument sientads ora. Keystone

Pliras spartas da l’agricultura èn pertutgadas da la chalira e setgira actuala, quai scriva l’Uffizi federal d’agricultura. Las mesiras da la Confederaziun duajan sustegnair las mesiras gia instradadas tras ils chantuns. En il center stettia la sminuziun dals dazis per fain.

Racolta da fain en general buna

La racolta da fain sajan per gronda part, tant da la quantitad sco da la qualitad, buna en bleras regiuns da la Svizra. Tuttina saja tras la setgira vegni tar stretgas e las cumpras necessarias da fain na pon betg vegnir cuvridas sulet cun fain ord la Svizra. Era saja en quasi l’entira Europa setgira uschia ch’ils pretschs per fain sajan pli auts che normal e cun sminuir ils dazis possia quai per part vegnir cumpensà, scriva l’Uffizi federal d’agricultura.

Mesiras dals chantuns restan

Lubidas restan vinavant regulaziuns spezialas en las spartas pajaments directs ed l’agricultura biologica. Latiers stattan a disposiziun emprests per gidanters da manaschi.

RR novitads 16:00