Il chantun avertescha che las infecziuns da corona possian puspè s’augmentar durant l’enviern. I dettia plirs facturs preoccupants, di la media chantunala Marina Jamnicki:
- La varianta delta dal coronavirus procuria cleramain per ina malsogna pli greva e tutgia era glieud pli giuvna.
- Per il mument sajan cun 67 pertschient dalla populaziun anc betg vaccinadas avunda persunas el Grischun.
- Las valurs da las auas da serenera inditgeschian che las infecziuns da corona creschian puspè.
Vaccinaziun effectiva – però nagina garanzia
En l'inscunter cun las medias ha declera Jamnicki ch'i haja bain dà cas mortals da persunas che sajan gia stadas vaccinadas cumplainamain. Quai saja dentant paucs cas, ins als possia dumbrar giu vid in maun, ed i sa tractia da persunas pli veglias. Da quai na possian ins però betg concluder ch'il vaccin na saja betg effectiv, di Jamnicki. Per lez stoppian ins adina guardar sin las cifras grondas e betg sin cas singuls.
Per trair conclusiuns ston ins adina guardar sin las cifras grondas, e betg sin singuls cas.
Appel da vaccinar en vista a l'enviern
Las ospitalisaziuns en il chantun mussian, che tut ils pazients sin las staziuns intensivas na sajan betg stads vaccinads. En vista a l'enviern saja quai dentant impurtant dad anc dauzar la quota da persunas vaccinadas. Quai per evitar che las staziuns intensivas sajan memia plainas per tut las persunas ch'èn durant l'enviern en il chantun.