L'agid per persunas pertutgadas da dependenza en il Grischun vegn augmentà. La Regenza grischuna extenda la collavuraziun existenta cun l'Uniun per l'agid da survivenza dal Grischun, per ils onns 2022 fin 2025.
Collavuraturas e collavuraturs prestan era agid d'urgenza
L'incumbensa da prestaziun cun l'uniun cuntegn l'engaschi a Cuira en favur da persunas pertutgadas da dependenza, e persunas senza suttetg. Finamira è da meglierar lur cundiziuns da viver. Collavuraturas e collavuraturs da «Streetwork» èn preschents en il spazi public, infurmeschan las persunas pertutgadas davart servetschs e purschidas da cussegliaziun, sco er faciliteschan l'access a tals. En situaziuns d'urgenza prestan ellas ed els ultra da quai agid immediat ed agid individual, per exempel cun tractar plajas u surdar vestgadira.
La cuntinuaziun da la lavur sociala a Cuira fa part da la purschida meglierada che la regenza ha decidì en il sectur da l'agid per persunas dependentas. Durant la sessiun da december 2021 ha il Cussegl grond approvà ils meds finanzials correspundents.